АНУ, Нью-Йорк, Олбани. 2009 оны 5 дугаар сарын 7. Сүр жавхлан, гүрүгийн нууцлаг увдисыг хослуулсан Дээрхийн гэгээн Далай лам Олбани хотынхны сэтгэлийг татаж, хүлээцтэй байдал, энх тайван, аз жаргалын тухай энгийн атлаа гүн утгатай захиасаа хөгжилтэй инээмсэглэл, цангинасан инээд, наргиантай яриагаар дамжуулан хүргэлээ. Тэрээр айлдвараа 10 жилийн өмнөх нэгэн дууны үгээс санаа авсан мэт санагдана. “Юунд ч бүү санаа зов. Жз жаргалтай бай”.
Дээрхийн гэгээн Далай лам “Палас” театрт айлдвар айлдахынхаа өмнө Краун Плаза зочид буудалд хэвлэлийн бага хурал хийлээ. Төвөдийн оюун санааны удирдагчаас дэлхийн эдийн засгийн хямрал, уур амьсгалын өөрчлөлтийн талаар асуухад ямар ч асуултад зөөлөн атлаа машид мэргэн хариулт өгч байв. “Энэ бүгд хүний гараар буй болсон асуудлууд. Хүн төрөлхтөн энэ бүх асуудлаа шийдвэрлэх чадвартай гэдэг нь логикийн хувьд тодорхой. Бид эдийн засгийн энэ хямралаас гарч чадна. Хүний мөн чанар түрэмгий, сүйтгэгч шинжтэй байвал ирээдүй минь сүйрэл рүү явж байна гэсэн бодол төрдөг. Гэвч энэ бол эндүүрэл” хэмээн хариулжээ. Асуулт тавьсан хүн бүрийн нүд рүү эгцлэн харж, англиаар, намуухан дуугаар ярьж байсан бөгөөд хажууд нь суусан орчуулагчтайгаа тун ховорхон зөвлөлдөж байв.
“Дотоод үнэт зүйлсдээ анхаарлаа илүү ихээр хандуул. Мөнгө дангаараа хангалттай биш. Цорын ганц анхаардаг зүйл нь мөнгө байдаг хүмүүс дэлхийн эдийн засаг нуран унах үед илүү их бэрхшээл, хямралтай тулгардаг. Харин жаргалтай гэр бүлтэй, эв найртай хамт олонтой хүмүүс харьцангуй бага бэрхшээл амсдаг юм шүү”.
Дээрхийн гэгээн дэлхийн өнцөг булан бүрийн сүсэгтэн олон, буддистуудын хүндэтгэн дээдэлдэг оюун санааны удирдагчийн хувьд өөрт нь ногдуулдаг үүрэг, байр суурийг даруухнаар тайлбарлав. “Би өөрийгөө эгэл нэгэн хүн, 6 тэрбум хүний нэг гэж үздэг. Бид асуудлаа шийдвэрлэх хүчирхийлэлгүй арга замыг улам олныг олох хэрэгтэй. Дайн болоод цөмийн зэвсэг хүний асуудлыг шийдэж хэзээ ч чадахгүй” хэмээн айлдсан билээ.
Тэрбээр Махатма Ганди, Мартин Лютер Кинг, Нельсон Мандела, хамба лам Десмонд Туту нарыг дурдан, тэдний сургаал номлолыг биширч явдгаа илэрхийлэв. Мөн буддизмаас өөр шашнуудыг хэрхэн хүндэтгэдэг тухайгаа ярьж, дэлхийн өнцөг булан бүрд байдаг шашны ариун газруудаар байнга зочлон, тэндээс сайн сайхан байдлыг мэдэрдгээ дурджээ. “6 тэрбум хүн бүгд нэгэн гэр бүл. Бүгд л жаргалтай амьдрахыг хүсдэг шүү дээ” хэмээжээ.
“Далай ламын Олбани хотод айлчлах болсон шалтгаан нь маргаан дагуулсан NXIVM байгууллагатай холбоотой юу?” гэсэн асуултад шууд хариулсангүй. Тус байгууллагыг зарим хүн шашны гаж урсгалтай төстэй гэж үздэг бөгөөд уг арга хэмжээг зохион байгуулахад ивээн тэтгэгчээр оролцжээ. “Намайг урьсан учраас би урилгыг хүлээн авсан” хэмээн хариулсан юм. Мөн хэвлэлийн бага хурлаас 5 минут хоцорсондоо сэтгүүлчдээс уучлал хүсэв. “Уучлаарай” хэмээгээд, үдийн зоог барьснаас болж саатсанаа тайлбарлажээ.
Далай лам Капитолын ордонд зочилсныхоо дараа Краун Плаза зочид буудалд морилон иржээ. Өөрийг нь харахаар цугласан хүмүүст ойртон, заримд нь хүрч мэндчилэв. Тэрбээр зочид буудалд ирээд төвөдүүд болоод нутгийн сүсэгтнүүдийн төлөөлөлтэй мэндчиллээ. Сүсэгтнүүд хүндэтгэл илэрхийлэн бөхийж, гартаа цагаан хадаг барьсан байв. Дээрхийн гэгээн хүрэн улаан өнгийн орхимжтой лам нарын тэргүүнд зөөлөн хүрч, бусад хүмүүстэй гар барин мэндчилжээ.
Гилдерланд хотын оршин суугч Викки Шактер, “Далай лам, аав хоёроосоо сурсан сургамжууд» хэмээх номынхоо нэгэн хувийг бэлэглэв. Дээрхийн гэгээн 1959 онд татуулсан хэдэн гэрэл зургийг үзэхээр түр саатжээ. Тэр үед Шактер сайн дурын сувилагчаар Энэтхэгт ажиллаж байсан бөгөөд Дээрхийн гэгээн гэр бүлийнхээ хамтаар мөн тэнд байжээ. “Далай лам миний зургуудыг үзэж, намайг анзаарснаа илэрхийлсэн нь маш сайхан байлаа” хэмээн 76 настай эмэгтэй ярив. Тэд хамгийн сүүлд уулзахад хоёулаа 20 гаруйхан настай байжээ. Төд удалгүй Хятад улс Төвөдийг эзлэн авч, Дээрхийн гэгээн Далай лам эх орноосоо дүрвэн гарахад хүрсэн юм. Бараг яг 50 жилийн дараа дахин уулзсан уулзалтын тухай Шактер ийн өгүүлэв. “Үнэхээр гайхалтай мөч байлаа. Энэ бүхнийг туулсан минь үнэ цэнтэй байсныг мэдрүүллаа”.
Далай ламын айлчлалыг зохион байгуулагчдын нэг Клэр Бронфман, “Миний бодлоор үнэхээр гайхамшигтай үйл явдал болж өнгөрлөө. Хот даяараа энэ тухай шуугьж байна” гэжээ.
Дээрхийн гэгээний айлчлалыг “Ethical Humanitarian Foundation, EHF” сан ивээн тэтгэсэн бөгөөд “World Ethical Foundations Consortium, WEFC” нь уг сангийн санаачилгуудын нэг нь аж. EHF болон WEFC-ийг хамтран үүсгэн байгуулагч Клэр Бронфман, эгч Сара Бронфман нар “Seagram” компанийн өв залгамжлагчид бөгөөд хувь хүний хөгжилд чиглэсэн сургалтуудыг явуулдаг, Нью-Йорк мужийн Колони хотод төвтэй NXIVM компанитай холбоотой хүмүүс юм. EHF, WEFC-ийн «үзэл санааны үндэслэгч» хэмээн нэрлэгддэг Кит Раниере нь NXIVM-ийг үүсгэн байгуулжээ. Раниере тэр өдөр Краун Плаза зочид буудалд байв.
Шүүмжлэгчдийн үзэж буйгаар NXIVM нь сэтгэл зүйд хор хөнөөл учруулж болзошгүй, хүний оюун санааг хянах арга ашигладаг, шашны гаж урсгалтай төстэй байгууллага аж. Харин Раниерегийн дэмжигчид эдгээрийг үндэслэлгүй гэж мэдэгддэг. Сүүлийн жилүүдэд хэвлэл мэдээллийн хэрэгслүүд Раниере болоод NXIVM-ийг тойрсон маргааны талаар олон удаа мэдээлжээ.
Сара Бронфман ч мөн Краун Плаза зочид буудалд байв. Тэрбээр Далай ламын айлчлалын талаар “Гайхалтай” хэмээгээд, дараа нь өөртэй нь холбоотой маргааны талаар ярив. “Энэ бүхэн надад амаргүй байсан ч илүү гүнзгий эргэцүүлж, дотоод хүч чадал, тууштай байдлаа нэмэгдүүлэх шаардлага тавьж байна. Хийж байгаа зүйлээ зөв гэдгийг мэдэж байгаа бөгөөд эцэст нь үнэн ил болно гэдэгт итгэдэг юм. Дээрхийн гэгээн Далай ламын захиас ч мөн ийм гэж бодож байна” гэж мэдэгджээ.
Дээрхийн гэгээн Далай ламын цуваа Капитолын ордон руу өгсөж, Сенатын хуралдааныг нээх үеэр сүсэгтнүүд...
