Энэтхэг, ХП, Дарамсала, Тэгчин Чойлин- Тунгалаг хөх тэнгэрийн дор уулс гэрэлтэх өнөө өглөө, Найчун хийдийн лам нар болон сүсэгтнүүд Дээрхийн гэгээн Далай ламыг урт наслахын тухайтад уншлага, залбирал өргөв. Миндролин хийдийн тэргүүн Хочхэн ринбүүчигийн тэргүүлсэн энэхүү ёслол нь Дээрхийн гэгээний хуучин лаврингийн нэгэн танхимд болсон юм. Цан, хэнгэрэг, их бага бүрээн дуу нь Дээрхийн гэгээнийг морилон ирснийг мэдэгдлээ. Цугласан олонтой мэндчилсэний дараа арслант ширээндээ залрав. Хочхэн ринбүүчи хүндэтгэл үзүүлэн хадаг өргөн барив.
Дээрхийн гэгээний зохиосон Ловон Бадамжунай бурханы уншлагаар хурал эхэлсэн бөгөөд Жамьяан Кенце Чоки Лодрэгийн Дээрхийн гэгээний өлмий бат оршихын тухайтад зохиосон уншлагаар цааш үргэлжлэв.
Цугласан олонд цай болон амтат будаа түгээв.
Далай ламд Бурхан багшийн лагшин, зарлиг, таалалын бэлгэдлийн хамт хот мандал өргөлөө. Дагинасын дүрийг илтгэх, таван навчит титэм, магнаг торгон өмсгөл бүхий таван лам хонх дамар дугарган танхимд орж ирэн арслант ширээний өмнө цугларав. Тэд алгаа гадагш хандуулснаар хамгаалах бэлгэдлийг үзүүлсэн, гарж одох гэж буй мэт босоо зогссон нь орхин явах ёсыг бэлгэджээ. Дээрхийн гэгээний тохой хэрийн хөрөг дүр танхимын ар хананд байх ажээ.
Хурлыг ахалж буй болон бусад ч лам Дагинасад хандан ном уншсан ба дагинас нь Ламыг ариун орон руугаа авч явахаар иржээ. Бүхий л адистэдийг оршоосон хөрөг дүр нь бодитой орших Ламаас ч илүү тэдэнд үнэ цэнтэй тул бодит Ламын оронд хөрөг дүрийг авч явж болдог билээ.
Важра дагина, Радна дагина, Бадма дагина, Гарма дагина болон Будда дагина нар нэг нэгээрээ арслант ширээний урдаас эргэж харалгүйгээр тус газрыг орхин, хөрөг дүрийн урд цуглах ажээ. Тэгээд тэд хөрөг дүрийг авч, гарч одов.
Найчун Чойжингийн гүртэн бээр Бурхан багшийн лагшин, зарлиг, тааллын бэлгэдлийг Дээрхийн гэгээнд өргөв. Жамьяан Кенце ринбүүчийн зохиосон Дээрхийн гэгээний өлмий батдахын тухайтад зориулсан уншлага залбирлыг дахин уншлаа.
Найчун гүртэн Дээрхийн гэгээний өөдөөс харан эхний эгнээнд Хочэн ринбүүчийн зүүн талд суух агаад Чойжин сахиусаа буулгав. Чойжин сахиус Дээрхийн гэгээний дэргэд хүрч, хамаг амьтны тусын тулд, дээдийн номын тухайтад урт наслахыг хүсэн залбирав. Дараа нь Чойжин сахиус хурлыг ахалж буй ламд хадаг өргөв. Сахиус биеэс нь гарах үед гүртэнг танхимаас дамнан авч гарлаа.
Танхимд олон төрлийн өргөл өргөж буй сүсэгтнүүдийн цуваа байх агаад Хочэн ринбүүчи Дээрхийн гэгээнд найман тахил болон хаан төрийн долоон эрдэнийг өргөж номоо номлон урт наслахыг хүсэн айлтгав. Найчун гүртэн буцан ирж Дээрхийн гэгээнд найман тахил өргөв.
Дээрхийн гэгээнийг урт наслаж өлмий батдахын тухай дахь Жамьян Кенце ринбүүчийн уншлагыг 3 дахь удаагаа уншлаа. Залгуулаад гайхамшигт тавдугаар Далай ламын “Гурван эрдэнэд залбирсан чин зүрхний айлтгал”, Гоцанпагийн залбирал зэргийг уншив.
Цугларсан олонд хандан Дээрхийн гэгээн түүнийг өлмий батдахын тухай дахь өнөөдрийн ёслолын хэсэг болох уншлага залбирлууд сайхан болсныг тэмдэглэлээ.
"Би хамаг амьтны тусын тулд тэрчлэн номыг улам дэлгэрүүлэхийн тулд илүү хичээж, цаашид ч энэ мэтчилэн үйлдэхийн тулд залбирсаар байх болно. Одоо дэлхий даяар оюун санаа, сэтгэл хөдлөлийн талаарх Бурхан багшийн сургаалыг анхаардаг болсон. Энэхүү мэдлэгийн талаар хуваалцаж, хамаг амьтны аз жаргал, амар амгаланг бий болгохын төлөө би үргэлжлүүлэн ажилласаар байх болно. Энэ дашрамд бат оршил өргөх ёслолыг хийсэн Найчун хийд, хийдтэй хамтран ажилласан, тус хийдэд харьяалагддаг бүх хүнд талархлаа илэрхийлье.
Англи хэлнээс орчуулсан Б.Баярмаа
