Энэтхэг, Химачал Прадеш, Дарамсала, Тэгчэн Чойлин – Дээрхийн гэгээн Далай лам хадагтай Узра Зеяаг Төвөдийн асуудал хариуцсан Америкийн Нэгдсэн Улсын тусгай зохицуулагчаар томилогдсонд баяр хүргэж, захидал илгээлээ. Тэрбээр Төвөдийн ард түмний нөхцөл байдлыг сайжруулахад жинтэй хувь нэмэр оруулж чадна гэдэгт итгэл дүүрэн байгаагаа илэрхийлжээ.
Дээрхийн гэгээн захидалдаа “Надад Америкийн үе үеийн удирдагчтай үзэл бодлоо хуваалцах завшаан тохиож байлаа. Америкийн Нэгдсэн Улсын тууштай бөгөөд тогтвортой дэмжлэг нь эрх чөлөө, нэр төрийнхөө төлөө энх тайвнаар тэмцэж байгаа Төвөдийн ард түмэнд асар их урам зориг өгдөг” гэжээ.
“Хэдий би улс төрийн эрх мэдлээ ардчилсан сонгуулиар сонгогдсон удирдлагад шилжүүлсэн боловч төвөд үндэстний оршин тогтнох эрх, өвөрмөц соёл, өв уламжлал, эмзэг байгаль орчныг хамгаалах талаар үргэлж санаа зовниж ирсэн. Таны анхны мэдэгдэлд эдгээр асуудлыг тэргүүлэх чиглэл болгон онцлон дурдсаныг хараад би баяртай байна.
Төвөдийн ард түмний энх тайванч тэмцлийг дэлхий нийт өргөн хүрээнд сонирхож, дэмжиж ирснийг та бэлхнээ мэдэж байгаа. Төвөдийн хүч үл хэрэглэх, энэрэн нигүүлсэхүйд тулгуурласан баялаг соёл уламжлал нь дэлхий дахинд өөрийн гэсэн хувь нэмэр оруулах боломжтой гэж би үздэг агаад хэтдээ үнэний хүч ялах болно гэдэгт итгэдэг.
Тантай уулзаж, таны дэмжлэг, санаачилгаар ахиц дэвшил гарч болох асуудлын талаар санал бодлоо солилцохыг тэсэн ядан хүлээж байна. Таныг манай сонгогдсон төвөд удирдлагатай нягт холбоотой ажиллана гэдэгт би итгэлтэй байна” хэмээн дурджээ.
Мөн Дээрхийн гэгээн, хадагтай Зея Төвөдийн асуудлыг хариуцахаас гадна ажлын чиг үүрэгтээ ардчиллыг бэхжүүлэх чиглэлийг гол болгохоор тусгасан нь, түүнчлэн саяхан болж өнгөрсөн ардчиллын дээд хэмжээний чуулга уулзалт өөрт нь их урам зориг төрүүлснийг захидалдаа тэмдэглэв.
Төгсгөлд нь Дээрхийн гэгээн АНУ ардчилал, эрх чөлөө, хүний эрх зэрэг үндсэн үнэт зүйлсийн талаарх ойлголтыг дэлхий дахинд түгээхэд тэргүүлэх үүрэг гүйцэтгэж чадна гэдэгт гүн бат итгэдгээ илэрхийлэв.
Англи хэлнээс орчуулсан Б.Баярмаа
