Энэтхэг, Химачал Прадеш муж, Дарамсала хот, Тэгчин Чойлин - Өнөөдөр цэлмэг хөх тэнгэрийн дор, өглөө эрт агаарын хэм намдуу хэвээр байх үеэр Дээрхийн гэгээн Далай лам өөрийн өргөөнөөс Төвөдийн гол дуган Зүглагханы зүг цахилгаан гольфын тэргээр морилов. Тэрбээр тэнд лам хувраг, гэлэнмаа нар болон эрэгтэй, эмэгтэй энгийн иргэд нийлсэн 4000 орчим хүмүүстэй хамт Төвөд хэлээр “Мани Дүндүв” гэх зан үйлийн дагуу энэрэл нигүүлслийн гуу сан Жанрайсиг бурхны тарнийг уншлаа. Бурхан багшийн мэндэлсэн, гэгээрсэн, нирваан дүр үзүүлснийг тэмдэглэн өнгөрүүлдэг "Их дүйчин" сарын эхний өдрөөс буюу сүүлийн тав хоногийн турш цугласан олноос маанийн тоо цуглуулж байгаа юм байна. Дээрхийн гэгээнтэн Бурхан багш болон Жанрайсиг Вати Санбогийн сэрэг дүрийн өөдөөс харан суудлаа эзлэхэд түүний баруун талд Намжил дацангийн хамба Тамтог ринбүчи сууж байв.
Дээрхийн гэгээнтэн Сэркон Цэншав ринбүчийн эмхэтгэсэн “Маанийн үрэл бэлтгэх гарын авлага”-ын дагуух зан үйлийг удирдан явууллаа. Уг зан үйл нь гурван эрдэнэ буюу бурхан, ном, хуврагийн чуулганд аврал одуулж, бодь сэтгэл хийгээд цаглашгүй дөрвөн сэтгэлийг үүсгэхээс эхэлсэн юм. Ёслолыг ивээн тэтгэсэн хүмүүсийн нэрсийг зарласны дараа төсөөлөлдөө бутээсэн бурхдад угаал өргөж, дамжлагын багш нарт залбиран, оролцогчид өөрсдийгөө Жанрайсиг бурханд бясалгах зан үйл үргэлжиллээ.
Хүссэн зорилго биелэхийн тухайд олон тооны үнэт эд зүйлсийг өргөсний дараа Жанрайсиг бурханд залбирав. Ёслолын тэргүүлж буй Дээрхийн гэгээнтний зүрхнээс Вати Санбо бурхны дүрийн өмнө мандал хэлбэрээр байрлуулсан маанийн үрэлнүүд рүү татсан утас адислалын урсгалыг дамжуулах аж. Энэ үед цугласан олон нэгэн зэрэг Ум мани бадмэ хум тарнийг уншлаа. Уншлага зуун үсэгт тарни, Дээрхийн гэгээнтний урт наслахын тухайд айлдсан хоёр багшийнх нь ерөөлүүд, Үнэн үгсийн залбирал, Дээрхийн гэгээнтний урт удаан наслахын төлөөх нэгэн шад болон бодь сэтгэлийг дэлгэрүүлэх дараах ерөөлөөр өндөрлөлөө:
Бодийн дээд эрдэнийн сэтгэл
Төрөөгүй нэгэнд нь төрөх болтугай
Төрсөн нэгэнд нь эс доройтож
Улам бүр өөдөө арвидах болтугай
Хийдээс хөдлөхөөсөө өмнө Дээрхийн Гэгээнтэн маанийн үрэлнүүдийг адислаж, Вати Санбо болон бурхан багшийн сэрэг дүрд хүндэтгэл үзүүлэв. Цахилгаан шат рүү алхаж, хашаан дундуур гольфын тэргээр явж өнгөрөх үедээ тэрбээр цугласан олны дундаас танил царайнуудаа олж хараад инээмсэглэн гар даллаж байлаа.
Англи хэлнээс орчуулсан Б.Одгэрэл
