Энэтхэг, ХП, Дарамсалаа, Тэгчин Чойлин - Дээрхийн гэгээнтэн Далай лам Фердинанд Маркост Филиппин Улсын Ерөнхийлөгчөөр сонгогдсонд нь баяр хүргэж, захидал илгээв.
Тэрбээр: “Таныг эх орон нэгтнүүдийнхээ, тэр дундаа нийгмийн эмзэг бүлгийн иргэдийнхээ хүсэл, эрмэлзлийг биелүүлэхийн төлөө учрах саад бэрхшээлийг амжилттай даван туулах болтугай хэмээн залбирч байна” гэж бичжээ.
Дээрхийн гэгээнтэн мөн “Намайг Филлиппиний ард түмэнтэй онцгой дотно харилцаатай байдгийг та анзаарсан байж магадгүй. 1959 онд эх орноосоо дүрвэж гарсны дараахан Рамон Магсайсайн нэрэмжит шагнал хүртэхэд минь филиппинчүүд надтай эв санаа нэгтэй байгаагаа илэрхийлж, тусалж дэмжиж байсан нь сэтгэлд минь тод үлджээ.
Танай улсын нэрт удирдагчийн нэрэмжит бөгөөд түүний алдар сууг мөнхжүүлэх зорилго бүхий энэ шагналыг хүлээн авсан тэр цагаас хойш би шударга, зоригтой байж бусдад туслахыг эрхэмлэж амьдрахыг хичээсээр ирлээ.
“Бидний соёл боловсрол, амьдралын гол түлхүүр болох энэрэл нигүүслийг дадуулах, хүчирхийллээс ангид байх тухай сургаалыг түгээн дэлгэрүүлэхийн төлөө би амьдралаа зориулсаар өнөөг хүрсэн билээ. Чухамдаа хүн төрөлхтөн бид нэг гэр бүл гэдгийг гүнээ ухамсарлах дадлыг даян дэлхийн ахан дүүсийн амар амгалангийн төлөө хувь нэмрээ оруулахыг хүссэн хэн бүхэн хэрэгжүүлж чадна гэдэгт би итгэдэг.
Англи хэлнээс орчуулсан Б.Баярмаа
