Тэгчин Чойлин, Дарамсала, Химачал Прадеш, Энэтхэг – Дээрхийн гэгээнтэн Далай лам өнөөдөр Энэтхэг улсын Ерөнхийлөгч Шримати Дроупади Мурмуд 65 насны төрсөн өдрийн баярын мэнд дэвшүүлж, захидал илгээлээ.
Тэрбээр захидалдаа “Танд эрүүл энхийг хүсэхийн ялдамд энэхүү эртний бөгөөд агуу улс орныг удирдах их үйлсэд тань амжилт хүсье” гэжээ.
Дээрхийн гэгээнтэн “Каруна (энэрэл нигүүлсэл) болон ахимса (хүч үл хэрэглэх) хэмээх эртний уламжлалт үзэл санаагаа хадгалан авч үлдсэн Энэтхэг улс нь олон шашин, итгэл үнэмшилтэй хүмүүс энх тайван, эв найрамдалтайгаар хамтдаа оршин суудаг үлгэр жишээ болсон орон юм. Өнөөдөр танай улсад ардчилал, хууль дээдлэх ёс, эрх чөлөө цэцэглэн хөгжиж байгаа нь эдгээр эртний үнэт зүйлстэй салшгүй холбоотой билээ. Алслагдсан тосгоны жирийн нэгэн иргэн төрийн тэргүүн болж чадаж байгаа нь энэ улсын өвөрмөц онцлог, агуу байдлын илрэл юм” хэмээн тэмдэглэжээ.
Тэрбээр цааш нь “Төвөдүүд бид Энэтхэгийг оюун санааны соёлынхоо эх ундарга хэмээн онцгойлон хүндэтгэдэг билээ. Наландагийн их сургуулийн уламжлал 8-р зууны үеэс эхлэн бидний хөгжилд хүчтэй нөлөөлөх болсон. Манай нэгэн их эрдэмт хүмүүн “Цастын орныг Энэтхэгийн гэрэл гэгээ гэрэлтүүлэхээс өмнө Төвөд орон харанхуйн дунд байсан” хэмээн хэлсэн удаатай.
Дэлхий нийтээрээ сорилт бэрхшээлтэй тулгарч буй өнөө үед эртний мэргэн ухааныг орчин үеийн боловсролтой хослуулж, нийтлэг сайн сайхны төлөө ашиглаж чадах цорын ганц улс бол Энэтхэг гэж хардаг. Тиймээс ч би оюун ухаан болон сэтгэлээ хэрхэн залуурдах талаарх Энэтхэгийн эртний мэдлэгийг дэлхийн өнцөг булан бүрт байгаа залууст түгээхийг хичээсээр ирсэн.
Энэтхэгийг зорин ирсэн төвөдүүд бидний хувьд энд суурьшаад 64 жил өнгөрчээ. Энэ бүх хугацаанд танай Засгийн газар болон ард түмнээс бидэнд үзүүлсэн өгөөмөр сэтгэлд маш их талархдаг. Хүн амынхаа тоогоор дэлхийд тэргүүлэх болсон хамгийн том ардчилсан улс Энэтхэгийн байр суурь өнөө цагт олон улсын хамтын нийгэмлэгийн дунд өсөн нэмэгдэж буйг хараад бахархаж байна. Дэлхий дахинд энх тайваныг цогцлоох үйлсэд Энэтхэг улс үлэмж хувь нэмэр оруулах бололцоотой гэдэгт би гүнээ итгэдэг” гэж дурджээ.
Төгсгөлд нь Дээрхийн гэгээнтэн Ерөнхийлөгчид сайн сайхны ерөөл дэвшүүлж, захидлаа залбирлаар өндөрлөжээ.
Орчуулсан Р.Манлай
