Энэтхэг, Шиватсэл, Лех, Ладак, ЮТ, Энэтхэг. Өнөөдөр Дээрхийн гэгээн Далай лам Энэтхэгийн дэд ерөнхийлөгчөөр сонгогдсон Шри Жагдип Данкхарт захидал илгээж, чин сэтгэлийн халуун баяр хүргэв.
Тэрбээр захидалдаа: Сүүлийн жилүүдэд Энэтхэг улс олон чиглэлд ялангуяа шинжлэх ухаан, технологийн салбар асар их ахиц дэвшил гаргаж байна. Амьдралынхаа ихэнх хугацааг энэ оронд өнгөрүүлснийхээ хувьд би өөрийгөө Энэтхэгийн нийгмийн нэг хэсэг гэж үздэг. Та энэхүү нэр хүндтэй албыг Энэтхэгийн тусгаар тогтнолын 75 жилийн ойн баяраар хүлээн авч буй нь бэлгэ дэмбэрэлтэй үйл явдал юм. Энэтхэг бол 'ахимса' (хүч үл хэрэглэх) ба 'каруна' (энэрэнгүй сэтгэл) гэдэг үзэл санааг төрүүлсэн орон бөгөөд энэ хоёр нь хүн төрөлхтөн хөгжин цэцэглэхэд ихээхэн хувь нэмэр оруулж чадна.
Махатма Ганди хүч үл хэрэглэх үзлийг дэлхий даяар түгээж, Мартин Лютер Кингээс Нельсон Мандела хүртэл удирдагчид олон жилийн зөрчилдөөн, нийгмийн асуудлыг шийдэхийн тулд энэ зарчмыг хэрэглэсэн байдаг. Хувь хүний зүгээс би энэ зарчмыг аль болох хэрэгжүүлэхийг хичээдэг бөгөөд энэхүү үнэт эрдэнэ мэт ойлголтыг энэрэнгүй сэтгэлийн хамтаар Энэтхэг ахан дүүс болон дэлхий даяар түгээхийн төлөө ажиллаж байна.
Энэтхэг орон бол эртнээс хүний сэтгэлийн хөдөлгөөн хийгээд оюун ухааны талаарх мэдлэгийн эх булаг гэдгийн бахархалтайгаар хэлнэ. Мөн түүнчлэн бясалгал, йога зэрэг оюун санааны сургалтын уламжлалт аргууд нь бүхий л хүн төрөлхтөнд одоо болон ирээдүйд ч ашиг тусаа өгч чадна.
Эртний Энэтхэгийн эл мэдлэг ухааныг орчин үеийн боловсролын системд, шашнаас ангид байдлаар буюу шинжлэх ухаан гэдэг утгаар нь тусгах нь маш чухал гэж би итгэдэг. Энэтхэг орон эдгээр хоёр мэдлэгийг хослуулах онцгой боломжтой орон юм. Энэ санаачилга хэд хэдэн мужид эхэлсэн гэдгийг би дуулсан бөгөөд цаашдаа улс үндэсний хэмжээнд өргөжнө гэдэгт найдаж байна.
Өнөөдөр олон улс даяараа Энэтхэгийг хүн төрөлхтний энх тайван ба хөгжилд үнэт хувь нэмэр оруулах манлайлагч орон болохыг хүлээн зөвшөөрч байна. Та олон жил төрийн албанд ажилласан арвин туршлагатай хүн бөгөөд Таныг энэ агуу орон болон түүний ард түмний төлөө амжилттай ажиллаж чадна гэдэгт би итгэл төгс байна гэжээ.
Дээрхийн гэгээнтэн аз жаргал хүсэн, залбирал талбин захидлаа төгсгөжээ.
Англи хэлнээс орчуулсан Б.Баярмаа
