Энэтхэг, Ладак, Лех, Шивацел Подран – Саяхан болсон сонгуулийн дүнг зарласны дараа Дээрхийн гэгээн Далай лам дэлхийн хамгийн их хүн амтай, ардчилсан Энэтхэгийн Ерөнхийлөгчөөр сонгогдсон Шримати Драупади Мурмуд баяр хүргэж, захидал илгээлээ.
Дээрхийн гэгээн цааш үргэлжлүүлэн "Дэлхий дахины хөгжил цэцэглэл, амар амгаланд Энэтхэг улсын оруулах хувь нэмэр, ач тусыг олон улсын хамтын нийгэмлэгүүд улам бүр ойлгон, ухамсарлах болсон энэ цаг үед та эрхэм хүндтэй төрийн тэргүүний албыг хүлээн авч байна.
Энэтхэг оронд олон жил суурьшин амьдарч буй зочны хувьд надад энэ сайхан орны өнцөг булан бүрээр аялах завшаан тохиолдсон бөгөөд энэхүү газар оронд чин зүрхний угаас гүн хүндэтгэлтэй ханддаг. Олон мянган жилийн туршид Энэтхэг орон “Каруна” буюу энэрэл нигүүлсэл, “Ахимса” буюу хүч үл хэрэглэх зарчмыг чанд баримталж ирсэн. Махатма Ганди хүч үл хэрэглэх зарчмыг дэлхий дахинд түгээн дэлгэрүүлсэн. Эдгээр зарчим нь хувь хүн төдийгүй дэлхий ертөнцөд амар амгаланг бий болгох боломжтой юм. Үнэхээр ч Энэтхэг бол олон олон нийгмийн бүлэг хамтран амьдардаг, шашин хоорондын эв нэгдлийн өлгий болсон орон билээ.
Буддын шашны гүн гүнзгий сургалтаар хүмүүжиж, төлөвшсөн учраас бодож сэтгэх минь үүнтэй салшгүй холбоотой байдаг. Иймийн тулд би өөрийгөө Энэтхэгийн хүү гэж тодорхойлдог. Та мэдэж байж болох юм, Төвөдийн буддын шашин, соёл нь Наладагийн их сургуулийн эрдэмтэн мэргэдийн хөгжүүлсэн учир шалтгаан, шинжлэн судлалын уламжлалд үндэслэсэн" гэв.
Тэрбээр цааш нь “Өнөөдөр орчин үеийн боловсрол асар их үнэ цэнэтэй, чухал боловч хэт материаллаг буюу эд юмсад голлон төвлөрч байна. Тиймээс оюун санаа болон сэтгэл хөдлөлийн талаарх эртний Энэтхэгийн эрдэм мэдлэгийг гүн гүнзгий ойлгуулж, сургах, сонирхолыг нь төрүүлж тэнцвэртэй боловсролыг бий болгох нь нэн шаардлагатай байна. Хүмүүс сэтгэл хөдлөлийн ариун цэврийг сахин, хөгжүүлэх боломжтой бөгөөд сөрөг сэтгэл хөдлөлөө хянан залж, улмаар оюун санааны амар амгаланг олно. Энэ үүднээс уламжлал, шинэчлэл хоёрыг хослуулах гайхалтай тохироо бүрэлдсэн орон бол Энэтхэг юм. Эртнээс уламжлагдан ирсэн үнэт зүйлс ялангуяа энэрэл нигүүсэлийн хүчийг Энэтхэгийн ахан дүүс болон дэлхий дахинд түгээн дэлгэрүүлэх, ойлгуулж таниулах, сонирхолыг нь төрүүлэхэд би үргэлжид хичээнгүйлэн ажиллах болно.
Таны мэдэж байгаачлан Төвөдийн ард түмэн бид эртний буддын соёл, төвөд үндэстний өвөрмөц онцлогийг хадгалах, хамгаалах бидний хичээл зүтгэлийг Энэтхэгийн Засгийн газар болон түүний ард түмний зүйрлэшгүй их дэмжлэгийг хүлээн авсан нь нэр төрийн хэрэг билээ. Энэхүү завшааныг ашиглан жар гаруй жил бидэнд халуун дулаан, элэгсэг дотно сэтгэлээр хандаж байгаа Энэтхэгийн ард түмэн, Засгийн газарт Таниар дамжуулан чин зүрхний угаас талархлаа дахин илэрхийлье.
Дээрхийн гэгээн шинээр сонгогдсон Ерөнхийлөгч Энэтхэг орны хүч чадлыг улам бүр бэхжүүлж, эртний Энэтхэгийн мэргэн ухаанаас урам зориг авч улмаар илүү амар амгалан дэлхийг цогцлоох үйлсэд манлайлал үзүүлнэ гэдэгт гүнээ итгэж буйгаа илэрхийллээ.
Ерөнхийлөгчид сайн сайхныг хүсэж, ерөөл залбиралаар захидлаа өндөрлөв.
