Бодгаяа, Бихар, Энэтхэг - Энэ өглөө Дээрхийн гэгээн Далай лам айлдварын талбайд ирэхэд хүмүүс бүрэн цуглаж амжаагүй байлаа. Тэрбээр хүмүүстэй мэндэлсний дараа хот мандлын өмнө залрав. Ямандаг бурхны эрх авшиг өгөх бэлтгэл хийхүйд өглөөн нарны туяа сэнтийн ард буй Дүйнхорын тэмдэг Нанжванданг гэрэлтүүлэн тусаж байв.
Дээрхийн гэгээн авшгийн бэлтгэл хийж буй нь. Бодгаяа, Бихар, Энэтхэг. 2018.01.21. Гэрэл зургийг: Лувсан Цэрэн
Дээрхийн гэгээнтэн магтаал болон “Эрдэм бүгдийн үндэс” судраас эш татан айлдсаны дараа Бодгаяад айлдаж буй номын төгсгөлийн өдөр болохыг зарлалаа. Тэрээр өнөөдрийн авшгийг гол өглөгийн эзэн болсон Төвөдийн Төв Захиргаанд хэд хэдэн албыг хашиж байсан хатагтай Кэлсанг Таклад онцгойлон талархал илэрхийлсэн юм.
Мөн маргаашнаас хоёр өдөр хятад шавь нартаа зориулан “Очир огтлогч судар”-ыг тайлбарлах ба энэхүү судар нь “Билгийн чанадад хүрэхүйн 300 бадагт” нэрээр танигдсаныг дурдав. Уг сударт “тайлбарын эш лүн” гэж байдаггүй тул өөрийнхөө ойлгосноор тайлбарлаж байгаа гэдгээ тодрууллаа. VIII Далай ламын багш Ёнзин Ишжалцан “Билгийн чанадад хүрэхүйн 8000 бадагт”-ыг тайлбарлаж байсан нь үүний жишээ ажээ.
Дээрхийн гэгээн Ямандаг бурхны эрх авшиг хүртээж буй нь. Бодгаяа, Бихар, Энэтхэг. 2018.01.21. Гэрэл зургийг: Лувсан Цэрэн
“Өнөөдөр би Ямандаг бурхны авшиг хүртээнэ. Үүнийг авсан хүмүүс судрыг тогтмол унших агаад Арван уур хилэнгийн бурхны урт мантрыг цээжлэх үүрэг хүлээдэг. Урьд нь хэлсэнчлэн энэ бясалгалын онцлог нь Mанзуширын амарлингуй болон догшин дүрийг хослуулж дүрслэн бүтээдэгт оршиж буй юм. Энэхүү сургаалын зорилго нь мэргэн ухаанд хүрэх бөгөөд Манзушир бол мэргэн ухааны биелэл билээ. Зовлонг гэтэлгэхийн тулд мунхаглалыг гэтэлгэх хэрэгтэй. Харин түүнийг мэргэн ухаанаар л давж чадна. Энэ л Буддагийн заасан зүйл юм.
Би энэхүү авшгийг анх Тагдрак ринбүүчигээс, дараа нь хэдэнтээ Лин ринбүүчигээс хүртэж байлаа. Сүүлчийн удаа Серконг Цэншаб ринбүчитэй хамт яг энд, Бодгаяад Махабоди суваргын хоёрдугаар давхарт авшиг хүртэж байсан юм. Энэ бол миний насан турш дадуулсан үйл юм. Ямандаг бурхны амарлингуй болон догшин дүрийг хослуулан бясалгаснаар миний амьдрал их өөрчлөгдсөн. Лин ринбүчид амласан ёсоороо би жил бүр Ямандаг бурхны бүтээл хийдэг”.
Зан үйлд оролцогчид адис авах үеэр нүдний боолт зүүсэн нь. Бодгаяа, Бихар, Энэтхэг. 2018.01.21. Гэрэл зургийг: Лувсан Цэрэн
Мөн Богд Зонхов бээр бясалгал дияаны гүнд нэвтэрснээр Манзушир бурхны догшин дүр Ямандаг бурхныг үзсэн гэдэг. Түүнчлэн хэрэв зүүдний иогийг дадуулбал “гэгээн гэрэл” гэдгийг онож чадна хэмээн авшиг олгох үйлийг эхлүүллээ.
Төгсгөлд Далай лам бээр Бодгаяад хоёр удаа Ямандагийн авшиг хүртээж буйдаа ихэд баяртай байгаагаа илэрхийлж, сүсэгтэн олны зүг гар далласаар Гандэн Пэлжээлин хийд рүү буцав.
Англи хэлнээс орчуулсан Т.Ялгуун
